التخمام مضرّ بالصحّة / الجبالي

الطبيب ...شافني قالي : شيء ما عندك يزي بلا عبث ما تلعبش بصحتك

اسمع كلامي نحي التخمام

وفى الحديث وما عندك كان الرجال

اول حاجة عملتها الساعة نحيت التخمام على الخواء

وفي الليل بطلت التخمام في بيت النوم ، ثم في بيت الراحة ، وليت نشعر بلذّة عظيمة

وهكذا دواليك حتى نحيتو جملة

حتى كيف نقعد مدة ما ندخّل حتى شيء في يدي للدار

تقلي مرتي اشنوة ماكش ناوى تخمم في دشيشة؟

نقلها شبيك هبلت ؟ تحب تقتلني ...ما تعرش اللي مسيقين علي التخمام

في الخدمة الحق متاع ربي عرفي ناس ملاح ..يقلي نفيق بيك تخمم نتفاهم معاك

ماو هو زاده كيفي شعرة لا كلاها اما لقف روحو على بكرى ...

منّعو "السبور"

معروف "السبور" ضربة ضربة للتخمام

غير المواطن مازال موش واعي ...

فاش يستناوا باش يشنوا حملات وقاية من حوادث التخمام ؟

يولي تلقيح الصغار اجباري

وفي التلفزة يشنوا حملة شعارها "التخمام مضر بالصحّة"

في الادارات يمنعوا التخمام بدون الاستئذان من الحاجب

في التراكن متاع الحوم العربي "ممنوع التخمام هنا"

وممنوع توظيف التخمام لاغراض سياسية

في الكيران ممنوع التخمام مع السائق

في البارات ممنوع التخمام بعد الثامنة

في رمضان ممنوع الاجهار بالتخمام

في المطار ممنوع تدخيل التخمام من بره

ممنوع حمل التخمام بدون رخصة

ممنوع التخمام بدون رصيد

...

وفرقة مقاومة التخمام خدامة حتى نقضيوا على هذى آفة التخمام جملة

وتولي بلادنا مضرب الامثال في مجال عدم التخمام وحتى من موقفنا يولي قوي في بلدان عدم التخمام

خمّم معايا في الحكاية مليح توة تلقاني عندي حقّ

كيفاش؟...

- صار انت كيفي بطّلت التخمام ؟ آه عمرك ما خمّمت جملة ؟ ....خير على الأقلّ ربحت صحّة بدنك