lundi 13 juin 2011

ربّي ، ربّك ، ربّ الكلّ

ربّي ربّك ربّ الكلّ ، ربّ اللي يسكر ويصليّ ربّ اللي يزنى ويصوم ربّ اللي بالكلام مفتون ،رب اللي فعلو خاينو وقلبو مغبون ،رب اللي عندو يد تحبو واللي ما تضرب كان الناس الي تحبو
رب المزطّل تحت حيط المدرسة الاعدادية هارب من الكراسات واسئلة المدير شبيك ما حجمتش شعرك
رب اللى عندو فينيات مالقاش باش يخلّصهم واللى عندو كريديات نسى يعدّهم واللى ما عندوش حق سيقارو اما يتكيف
ربّ المهبولة المتاكلة المذمومة بدنها كي البلفيدير يزوره كبار وصغار
ربّ المقدية اللي تعرف تعقد النية وتجيب سيدها للثنية
ربّ اللي تشهق ما تلحق واللى كي تلحق تغرق بلا شهقة
رب الكار الصفراء اللى شاربة عرق الخدّامة واللى علّمت اليتامى النشله والترهيص
رب الدودة الخضراء الى تشّق البلاد كى اللام وتغرقنا في دم كل يوم، نجريو على كلّ شيء ونجريو على حتى شيء وننساو نتفقدونا ساعة ساعة
ربّ السماء اللي تقطر وهج وبرد ومطر وملح وسخط مسخط ورحمة
ربّ السقف اللى يقطر جوع و فقر وزطله
ربّ الوحله
ربّ الذكريات اللي تحفرت في بدونات مرشومة كل سيكاتريز تحكيلك على اللى فات
ربّ الطابونة والمحماش رب البيرة بالحارة رب الهجالة اللى تجري على اللقمه
ربّ العاهر اللي ما لقاتش خدمة
ربّ الامام اللي يفتي على البصّه لابس جبة سكرودة حقّها قدّ خدمة البناي في عام كامل
ربّ المصهود يليّق في الحيوط وما عندو وين يسكن ويكن راسو
ربّ الرّسل والارساليات القصيرة ربّ المعجزات والصدر والعجز والاعجاز والعجز والتعجيز
ربّ الكراهب اللي تزمر على ضوء أخضر
ربّ الترمة الباردة اللي ما يهمها قرص
ربّ اللقمه البارده اللي تتسربى تحت الطواول
ربّ البدونات الواحلة في كحة والبدونات الغارقة في ملحها وملح الغير
ربيّ، ربّك ،ربّ الكل
ربّ المسلم المسالم المستسلم
ربّي، ربّك ،ربّ الكل
ربّ الكافر بالرّب والسماء وكي يضيق عليه الحال يقول يا ربي وينك؟
ربّ العصافر اللي تزقزق في السماء ورب العصافر اللي حجبو عليها السماء وحطوها في قفص مزيان
ربّ النعاج والذيوبة والغابة المصلوبة على شعار الجمهورية
ربّ النيكوتين والترهدين
ربّ التنبير
رّب دجاج الماكينة والصابون قوالب قوالب
ربّ الاوناس وريحة البلاد المنتنه
ربّ النوّار اللي بلا ريحة والبوكيات البلاستيك
ربّ الريق والتمجليغ ربّ الفراشات اللي تجنّح في طاسة مخّك كي تتفكّر وتنسى
ربّ الجحيم الغول والعنقاء
ربّ السرادك اللى تعوعش عليك صباح وعشية وساقيها في الغرم محشية
ربّ الاناناس اللى تراه مصور على كعبة الياغوت وعمرك ما ذقتو
ربّ الشيح والزعتر والاكليل
ربّ الجبل الهامل والحلفاء
ربّ الوجوه المدخنه وبهمّها محكّله
ربّ التبسيمة الصفراء والخزره الحرشاء
ربّ الانياب
ربّ الناس اللى حاله قلبها سقيفة للاوجاع
ربّ العباد اللي شاهية تُطاع باسم الرّب
ربّ المرشي والخضرة والخُضار
ربّ الكالاتوس والصنوبر اللى تلهم فيه النار
ربّ الجمعة والاحد
ربّ اللى ما عندو حد
ربّ اللى عندو بوه ويجبد وما يتهد
ربّ الضحكة الصافية والكلمة الدافية
ربّ الانتصارات والانكسارات والانهزامات
ربّ الوالي والمعتمد والزوالي ربّ رئيس الحكومة المؤقتة والعسكر والحرامي
ربّ الخلق والخليقة والخُلق والاخلاق المفرعسة والمحتشمة
ربّ الناس اللى تنسى
ربّ السماء والارض وما بيناتهم طول وعرض وارتفاع
ربّ الكلمة ربّ الصوت الساكت والمطلوق
ربيّ ربّك ربّ الكلّ ماهوش متاعك وحدك

8 commentaires: