اكتب

اكتب باش ما تنساش ، اكتب باش تأرّخ ، لحظة مزروعة في الزمان ما ينجّم يشدّها حتى حدّ حتّى اللي خلقها فلتت منو بعد ما رماها في الفضاء الفسيح ، فمّة كان الحرف والتصويرة ينجمو يكونو منداف في الذاكرة يكبّش في الحاجة اللى تحبها و ما تتنساش ، الحرف يترجم وجايعك الكلّ بالوحدة بالوحدة ويعاونك تقول آي ، كي تقولها ديجا تولي تتنفّس خير بلا غصة ، الحرف ينجّم يخليك تزغرط من غير ما تعيّط وتفزّع خلق ربّي في الكيّاس والا القهوة والا حتى بيت الراحة ، تزغرط في قلبك وتتحزّم ملايكتك وتشطح فزّاني معاك في طاسة مخّك من غير ترخيص من البلدية ولا عرابن للعوّاده المضروبة اللي تعمل خمسة طهورات وزوز وطيات وحنة وعرس في ليلة ، راسك راس روحك بحروفك عامل مملكة انت فيها رع ،رع هو بيدو مش كليشيات ملك ملوك افريقيا ، الكتابة هي الفعل التحرري الوحيد اللي تتعرى فيه من همومك وهواجسك وفرحتك وحيرتك وتخلعهم عنك كمعطف المطر وتعلّقهم على الورقة قدّامك فوق الجمل وفوق الاسطر اللى تكبر وتتوسّع وتتكاثر في الورقة البيضاء الفارغة لين تتعبى وبعد ما تفرّغ فيها جاشك تنجّم تغمّ على راسك وترقد وتجيك العصافر لحلمتك ايا كان نوعها وتشوف البوقرعون وتجري مع الارانب ويسبقك الفكرون وتمشي ع الشّط لين ما يوفاش وتخيّط من خيوط المطر كشكول وتشدّ صطوب للريح وتنبز الشمس تبكي وتتوسّط القمره باش تصلّح بيناتكم ، فمة انت والخيال ، الخيال اللي يحلّ البيبان ويعلّمك الأحلام ويعطيك فرصة تكبر وتصغر وتشيب وترتع وتنقز وتبكي وتضحك تتبسّم تشرق بالفرحة وتسرح عينيك تترشق في نقطة في الهواء تقعد تهزّ وتسبط وما تعرفش فين هزاتك الخزرة ، اكتب باش ما تنساش انّك بشر تعمل برشة حاجات اخرين غير انّك تاكل وتروّث وتفتي وتغوّث ، اكتب باش ما تبقاش عايش بركة تتنفّس اماّ باش تبقى حيّ حيّ حيّ